कोशी प्रदेश प्रहरी कार्यालय विराटनगरको सभाहलमा पत्रकार भेटघाट तथा अन्तरक्रिया कार्यक्रम सम्पन्न भएको छ । साउन २६ गते आयोजित कार्यक्रममा उपस्थित पत्रकारहरुसंग कोशी प्रदेश प्रहरी प्रमुख प्रहरी नायव महानिरीक्षक शेखर खनालले भेटघाट तथा अन्तरक्रिया गर्नु भएको छ ।

कार्यक्रममा उपस्थित पत्रकारहरुलाई सम्वोधनको क्रममा प्रदेश प्रहरी प्रमुख खनालले समाजमा शान्ति, सुव्यवस्था कायम गर्न प्रहरी र सञ्चार क्षेत्रको भूमिका महत्वपूर्ण रहेको बताउनुभयो । उहाँले कोशी प्रदेश प्रहरी शुन्य सहनशिलता कायम गरी हरेक कार्यहरुमा पारदर्शिता र जवाफदेहिता बनाउदै नागरिक प्रति उत्तरदायी र विश्वासिलो भई काम गर्ने, अपराध रोकथाम तथा नियन्त्रण, लागूऔषध नियन्त्रण, सिमावर्ती अपराध र अन्तरदेशिय अपराध नियन्त्रण, साईवर तथा डिजिटल अपराध नियन्त्रण, महिला, बालबालिका तथा जेष्ट नागरिक मैत्री प्रहरी सेवा प्रवाह, ट्राफिक व्यवस्थापन तथा राजमार्ग सुरक्षा व्यवस्था प्रभावकारी बनाउने तथा संचार माध्यमसंग समन्वय र सहकार्यलाई प्राथमिकता दिँदै कोशी प्रदेशमा शान्ति सुरक्षा प्रभावकारी बनाउन रुपमा आवश्यक सुरक्षा रणनीति र कार्ययोजना अनुसार प्रहरी परिचालन गर्ने बताउनु भयो । यसका साथै उहाँले कार्यक्रममा स्थानिय पत्रकारहरुबाट उठेका जिज्ञासाहरुको समेत सम्वोधन गर्नु भएको थियो ।

कार्यक्रममा कोशी प्रदेश प्रहरी कार्यालयका प्रवक्ता प्रहरी वरिष्ठ उपरीक्षक योगेन्द्र सिंह थापाले कोशी प्रदेशमा प्रहरी परिचालन, शान्ति सुरक्षाको अवस्था, अपराध नियन्त्रण, ट्राफिक व्यवस्थापन तथा प्रहरीद्वारा गरिएका सफल अनुसन्धानको  विवरण सहितको तथ्याङ्क प्रस्तुत गर्नु भएको थियो ।

उक्त कार्यक्रममा प्रदेश प्रहरी कार्यालय विराटनगरका प्रहरी उपरीक्षक सुमन कुमार तिम्सिना सहित सिनियर प्रहरी अधिकृतहरुको साथै बिभिन्न संचार माध्यममा आवद्ध पत्रकारहरु तथा संचारकर्मीहरुको उपस्थिति रहेको थियो ।