कोशी प्रदेश प्रहरी प्रमुख प्रहरी नायव महानिरीक्षक शेखर खनालले जिल्ला प्रहरी कार्यालय मोरङको निरीक्षण भ्रमण गर्नु भएको छ । साउन २५ गते निरीक्षण भ्रमणको क्रममा उहाँले कार्यालय तथा सम्पुर्ण शाखाहरुको निरीक्षण गर्नुका साथै जिल्ला प्रहरी कार्यालय तथा मातहत कार्यालयहरु समेतबाट उपस्थित प्रहरी अधिकृत तथा जवानहरुलाई आवश्यक निर्देशन दिनु भएको छ । निर्देशनको क्रममा उहाँले प्रहरी आफैं समस्याको कारक नभई समाधानको माध्यम बन्नुपर्छ भन्ने उद्धेश्यका साथ जनसेवामा समर्पित हुन निर्देशन दिनु भएको छ । उहाँले कानुन र Chain of Command को पुर्ण पालना गर्दै सामाजिक सञ्जालको मर्यादित प्रयोग र सूचनाको गोपनीयता कायम राख्दै  कसैको दबाब, प्रभाव वा प्रलोभनमा नपरी पारदर्शी रूपमा प्रहरी सेवा प्रदान गर्न निर्देशन दिनु भएको छ । सीमा क्षेत्रमा अवैध चोरी–निकासी, पैठारी र लागूऔषध नियन्त्रणका लागि कडाइका साथ चेकजाँच तथा अपरेसन सञ्चालन गर्न, पेण्डिङ मुद्दा फर्छ्यौट, साइबर अपराध, अनलाइन ठगी, स्क्यामिङ, बेटिङ र हुण्डीजस्ता अपराध नियन्त्रणमा प्रभावकारी भुमिका निर्वाह गर्न र सामाजिक सञ्जालबाट अफवाह फैलाउनेमाथि कडा निगरानी सहित कानुनी कारबाही गर्न निर्देशन दिनु भएको छ । साथै उहाँले समुदाय-प्रहरी साझेदारी कार्यक्रमहरु मार्फत आम नागरीकहरुसंग सद्भाव र भाइचारा अभिवृद्धि हुने गरी सचेतनामुलक कार्यक्रमहरुलाई निरन्तरता दिन, सवारी दुर्घटना न्यूनीकरण गरी ट्राफिक व्यवस्थापन प्रभावकारी बनाउन,  आगामी दिनमा विराटनगरमा हुने राधाकृष्ण रथयात्राको सुरक्षा व्यवस्था तथा आपराधिक गतिविधि नियन्त्रण गर्न थप सुरक्षा व्यवस्था प्रभावकारी बनाउन निर्देशन दिनुभयो । निरीक्षण भ्रमणको क्रममा प्रदेश प्रहरी प्रमुख खनाललाई जिल्ला प्रहरी कार्यालय मोरङका प्रमुख प्रहरी उपरीक्षक कबित कटवालले मोरङ जिल्लाको समग्र शान्ति सुरक्षाको अवस्थाको  बारेमा अवगत गराउनु भएको थियो ।