सुनसरीको धरान उप-महानगरपालिकाको दुई छुट्टाछुट्टै स्थानबाट लागुऔषध गाँजा सहित २ जनालाई प्रहरीले पक्राउ गरेको छ । लागुऔषध गाँजाको ओसार पसार भईरहेको भन्ने बिसेष सूचनाको आधारमा ईलाका प्रहरी कार्यालय धरानबाट खटिएको प्रहरी टोलीले धरान-११ रिटिङ टोलबाट स्थानीय १९ बर्षीय मौषस राईलाई ३६ केजी गाँजा सहित र रेसुङगा चोकका २२ बर्षीय अभिशेष शेर्मालाई ५२ केजी गाँजा सहित शनिवार दिउँसो पक्राउ गरेको हो । राईले चलाएको १-०२-००३ ह ३७४ नम्बरको अटो र शेर्माले चलाएको को १ ह ५०९८ नम्बरको अटोलाई चेकजाँच गर्ने क्रममा टेम्पोको डिकिको भागमा लुकाई छिपाई राखेको अवस्थामा उक्त परिमाणको गाँजा बरामद भएको थियो । गाँजा सहित पक्राउ परेका दुवै जनाको सम्बन्धमा ईलाका प्रहरी कार्यालय धरानबाट थप अनुसन्धान भईरहेको छ। यसैगरी सुनसरीको बर्जु गाउँपालिका-६ बाट ६१ केजी गाँजा बरामद भएको छ । लागुऔषध लुकाई छिपाई राखेको भन्ने बिशेष सूचनाको आधारमा जिल्ला प्रहरी कार्यालय सुनसरीबाट खटिएको प्रहरी टोलीले खोजतलास गर्ने क्रममा गढी गाऊपालिको बिभिन्न स्थानहरुमा खेतमा परालले छोपेर राखेको बेवारीसे अवस्थामा ६१ केजी बरामद भएको र सो सम्बन्धमा प्रहरीले थप अनुसन्धान गरिरहेको जिल्ला प्रहरी कार्यालय सुनसरीले जनाएको छ ।