लागू औषध ब्राउन सुगर सहित ३ जना पक्राउ

२०८३-०६-०९

A
A^-
A⁺

झापा र मोरङ जिल्लाको विभिन्न स्थानबाट लागू औषध ब्राउन सुगर सहित ३ जनालाई पक्राउ गरिएको छ । असोज ८ गते चेकजाँचको क्रममा झापाको प्रहरी चौकी टाघनडुब्बाले बाह्रदर्शी गाउँपालिका-६ का घनश्याम अधिकारी र पाँचथर फिदिम नगरपालिका-११ का राजु कुमार मेयोङबोलाई ७ ग्राम ५६ मिलिग्राम ब्राउन सुगर सहित पक्राउ गरेको छ भने मोरङको इलाका प्रहरी कार्यालय रानीले धरान उप-महानगरपालिका-१० का शिवराज राईलाई ८ ग्राम ६२० मिलिग्राम ब्राउन सुगर सहित पक्राउ गरेको छ । ब्राउन सुगर सहित पक्राउ परेका उनीहरुको आवश्यक कानूनी कारवाही भईरहेको छ ।

सम्बन्धित समाचार

भदौ महिनाको सर्वोत्कृष्ट प्रहरी घोषित

२०८३-०६-०९

कोशी प्रदेश प्रहरी कार्यालय विराटनगरले जिल्ला प्रहरी कार्यालय इलाममा कार्यरत प्रहरी निरीक्षक दिवश रिमाललाई २०८३ साल भदौ महिनाको “सर्वोत्कृष्ट प्रहरी” (BEST POLICE OF THE MONTH) घोषित गरेको छ ।विभागीय मूल्य-मान्यता, आदेश-निर्देशनको पालना गरी उच्च मनोबल र व्यावसायिकता प्रदर्शन गर्दै आफ्नो पदीय कर्तव्य वहन गर्ने क्रममा प्रहरी निरीक्षक दिवश रिमालले भदौ ५ गते इलाम नगरपालिका-७, कुलधारा स्थित कुवेर प्रसाद शर्माको घरमा रहेको सेफ्टी ट्याङ्की सफा गर्ने क्रममा सोही स्थानका ४७ बर्षीय रामसी डोम ट्याङ्की भित्र अचेत अवस्थामा रहेको भन्ने जानकारी प्राप्त हुनासाथ प्रहरी निरीक्षक दिवश रिमाल समेतको प्रहरी टोली तत्काल उक्त स्थानमा खटि प्रहरी निरीक्षक दिवश रिमालले जोखिम मोलेर सेफ्टी ट्याङ्की भित्र प्रवेश गरी अचेत अवस्थामा रहेका रामसी डोमलाई सकुशल उद्धार गर्न महत्वपूर्ण भुमिका निर्वाह गर्नुका साथै अनुशासित, व्यवसायीक र कर्तब्यनिष्ठ तवरले कर्तव्य पथमा तल्लिन रही उच्च मनोवलका साथ आफ्नो कर्तव्य वहन गरी आम सर्वसाधारण नागरिकलाई सुरक्षाको अनुभुति गराउन तथा आम नागरिक माझ प्रहरी संगठनको गरिमा एवं श्रीवृद्धिका लागि उल्लेखनीय कार्य सम्पादन गरेको हुँदा निज प्रहरी अधिकृतबाट सम्पादित कार्यको उच्च मूल्याङ्कन गर्दै २०८३ साल भदौ महिनाको “सर्वोत्कृष्ट प्रहरी” (BEST POLICE OF THE MONTH) घोषणा गरिएको हो ।

बिभिन्न मुद्दाका ४ जना फरार प्रतिवादीहरु पक्राउ

२०८३-०६-०९

विभिन्न मुद्दामा दोषी ठहर भई फरार रहेका ४ जना फरार प्रतिवादीहरुलाई प्रहरीले खोजतलासको क्रममा फेला पारी पक्राउ गरेको छ । अपराध नियन्त्रण गरी समाजमा शान्ति सुरक्षा व्यवस्था प्रभावकारी बनाउन तथा कानून कार्यान्वयन गर्दै आम नागरिकमा प्रभावकारी प्रहरी सेवा प्रदान गर्न परिचालन भएको प्रहरी टोलीले खोज तलासको क्रममा असोज ८ गते झापाबाट १ जना, मोरङबाट १ जना, सुनसरीबाट १ जना र धनकुटाबाट १ जना पक्राउ गरेको हो । पक्राउ परेकाहरुबाट १ वर्ष ६ महिना २८ दिन कैद सजाय र २३ हजार रुपैयाँ जरिवाना वापतको रकम असुल उपर भएको छ भने उनीहरुलाई कैद भुक्तानको लागी कारागार पठाएको छ ।

अवैध पाउडर दुध बोकेको पिकअप गाडी सहित २ जना नियन्त्रण

२०८३-०६-०९

सुनसरीको इनरुवा नगरपालिका-३ डाँडाटोल स्थितबाट अवैध पाउडर दुध बोकेको पिकअप गाडी सहित २ जनालाई प्रहरीले नियन्त्रण लिएको छ । असोज ८ गते राती जिल्ला प्रहरी कार्यालय सुनसरीबाट खटिएको प्रहरी टोलीले चेकजाँचको क्रममा प्रदेश १-०१-००२ च १८६४ नम्बरको पिकअप गाडीमा भन्सार छलि ल्याएको ३ सय ३० किलोग्राम पाउडर दुध (करिव २ लाख ६४ हजार मुल्य बराबरको) बरामद गरेको थियो । अवैध दुध बरामद भए संगै उक्त पाउडर दुध र पिकअप गाडी सहित ओसार पसारमा संलग्न चालक सुनसरी देवानगंज-२ का ४३ बर्षीय ज्ञानदेव मेहता र इटहरी-५ का ४० वर्षीय अर्जुन खड्कालाई नियन्त्रणमा लिएको छ । बरामद भएका पाउडर दुध र पिकअप गाडी सहित संलग्न व्यक्तिहरुलाई आवश्यक कारवाहीको लागी सुनसरी भन्सार कार्यालय सेतुबन्ध पठाईएको छ ।

आर्थिक वर्ष २०८३/०८४ को वार्षिक कार्यसम्पादन सम्झौता हस्ताक्षर कार्यक्रम सम्पन्न

२०८३-०६-०७

कोशी प्रदेश प्रहरी प्रमुख प्रहरी नायब महानिरीक्षक शेखर खनाल तथा कोशी प्रदेश अन्तर्गत रहेका १४ वटै जिल्ला प्रहरी प्रमुखहरूका साथै प्रदेश अन्तर्गतका अन्य मातहत कार्यालय प्रमुखहरू बीच आर्थिक वर्ष २०८३/०८४ को वार्षिक कार्यसम्पादन सम्झौता पत्रमा हस्ताक्षर कार्यक्रम सम्पन्न भएको छ । साथै नेपाल प्रहरी संगठन प्रमुख प्रहरी महानिरीक्षकज्यू र कोशी प्रदेश प्रहरी प्रमुख बीच आर्थिक वर्ष २०८२/०८३ मा सम्पन्न भएको वार्षिक कार्य सम्पादन सम्झौतामा कोशी प्रदेश प्रहरी कार्यालय विराटनगरले ८६.३६ प्रतिशत लक्ष्य हासिल गरी सर्वोत्कृष्ट प्रदेश प्रहरी कार्यालय हुन सफल भएको छ भने कोशी प्रदेश प्रहरी प्रमुख र कोशी प्रदेशका १४ वटै जिल्ला प्रहरी प्रमुखहरु बीच आर्थिक वर्ष २०८२/०८३ मा भएको वार्षिक कार्य सम्पादन सम्झौतामा जिल्ला प्रहरी कार्यालय संखुवासभाले ९४.३८ प्रतिशत लक्ष्य हासिल गरी सर्वोत्कृष्ट जिल्ला प्रहरी कार्यालय हुन सफल भएको छ । त्यस्तै जिल्ला प्रहरी कार्यालय भोजपुरले ९१.८१ प्रतिशत लक्ष्य हासिल गरी दोस्रो, जिल्ला प्रहरी कार्यालय धनकुटाले ९१.४८ प्रतिशत लक्ष्य हासिल गरी तेस्रो र क्रमशः खोटाङले ९१.०५ प्रतिशत, पाँचथरले ९०.७९ प्रतिशत, सोलुखुम्बुले ९०.०४ प्रतिशत, ताप्लेजुङले ८९.९१ प्रतिशत, मोरङले ८९.८६ प्रतिशत, उदयपुरले ८९.५९ प्रतिशत, सुनसरीले ८९.१३ प्रतिशत, झापाले ८६.९४ प्रतिशत, तेह्रथुमले ८६.१० प्रतिशत, इलामले ८४.५१ प्रतिशत र ओखलढुंगाले ८३.८३ प्रतिशत लक्ष्य हासिल गरेका छन् ।गत आर्थिक वर्ष २०८२/०८३ मा जिल्ला प्रहरी कार्यालयहरुको वार्षिक प्रगति औसत ८९.२५ प्रतिशत र मातहत अन्य प्रहरी कार्यालयहरुको वार्षिक प्रगति औसत ९८.१४ प्रतिशत साथै समग्रमा औसत प्रगति ९३.६९ प्रतिशत रहेको छ ।कार्य सम्पादन करारमा हस्ताक्षर सम्पन्न भए पश्चात् प्रहरी नायब महानिरीक्षक खनालले मातहत जिल्ला प्रहरी कार्यालय तथा अन्य कार्यालयका प्रमुखहरुलाई शान्ति सुरक्षा, अपराध नियन्त्रण र अनुसन्धान, विपद व्यवस्थापन, प्रहरी आचरण र व्यवहार, ट्राफिक व्यवस्थापन लगायतका विषयहरुमा आवश्यक निर्देशन समेत दिनुभयो ।

ब्राउन सुगर सहित २ जना पक्राउ

२०८३-०६-०७

कोशी प्रदेश प्रहरी कार्यालय विराटनगर (PIT) र इलाका प्रहरी कार्यालय धरानबाट खटिएको प्रहरी टोलीले ब्राउन सुगर सहित २ जनालाई पक्राउ गरेको छ । असोज ६ गते विशेष सूचनाको आधारमा परिचालित प्रहरी टोलीले प्रदेश १-०२-०५५ प ४६६ नम्बरको स्कुटरमा सवार धरान-१२ का सुनिल क्षेत्री र धरान-१९ का रुदिन भूजेललाई चेकजाँच गर्ने क्रममा सुनिल क्षेत्रीले मलद्वारमा लुकाई राखेको ब्राउन सुगर ५ ग्राम २८० मिलिग्राम बरामद गरेको थियो । प्रतिवन्धित लागूऔषध ब्राउन सुगर बरामद भएसंगै दुबै जनालाई पक्राउ गरी इलाका प्रहरी कार्यालय धरानबाट थप अनुसन्धान तथा आवश्यक कानूनी कारवाही भईरहेको छ ।

लागूऔषध गाँजा बोकेको ट्रक नियन्त्रणमा

२०८३-०६-०७

इलामको इलाम नगरपालिका-९ भञ्ज्याङ स्थित मेचीराजमार्गबाट १ हजार ५ सय ४ किलो ६१० ग्राम लागू औषध गाँजा बोकेको ना. ४ ख ८९९६ नम्वरको ट्रक प्रहरीले नियन्त्रणमा लिएको छ । असोज ६ गते बेलुकी प्रहरी चौकी गोलाखर्कबाट गस्तीमा खटिएको प्रहरी टोलीले चेकजाँचको क्रममा ट्रकमा फल्स बटम बनाएर त्रिपालले छोपी प्लास्टिको ४१ वटा बोरामा लुकाई छिपाई राखेको अवस्थामा १ हजार ५ सय ४ किलो ६१० ग्राम गाँजा बरामद गरेको थियो । लागू औषध गाँजा बरामद भएसंगै उक्त ट्रक नियन्त्रणमा लिएको छ भने ओसार पसारमा संलग्न चालकको खोजी कार्य भईरहेको छ ।