मोरङबाट बेवारिसे ३ नाल र इलामबाट १ नाल भरुवा बन्दुक सहित १ जनालाई प्रहरीले पक्राउ गरेको छ । भदौ १४ गते इलामको देउमाई नगरपालिका- ५ का ३६ बर्षीय राज कुमार तामाङले घरमा भरुवा बन्दुक लुकाई छिपाई राखेको छ भन्ने बिशेष सूचनाको आधारमा इलाका प्रहरी कार्यालय मंगलबारेबाट खटिएको प्रहरी टोलीले घर खानतलासी गर्दा उक्त घरबाट १ थान भरुवा बन्दुक फेला पारी तामाङलाई नियन्त्रणमा लिएको हो । त्यस्तै मोरङको मिक्लाजुङ गाउँपालिका- ६ स्थित मयुर सामुदायिक वन भित्र चोरी शिकारी हुने गरेको भन्ने बिशेष सुचनाको आधारमा इलाका प्रहरी कार्यालय उर्लाबारीबाट खटिएको प्रहरी टोलीले उक्त जंगलबाट बोरा भित्र बेवारिसे अवस्थामा रहेको भरुवा बन्दुक ३ नाल, फलामको नाल १ थान, बारुद १९ ग्राम २४० मिलिग्राम, ९८ वटा फलामको व्यारिङ, १३ वटा फलामका टुक्राहरु र झुम्रो समेत बरामद गरेको छ ।