कोशी प्रदेश प्रहरी प्रमुख प्रहरी नायव महानिरीक्षक शेखर खनालले साउन २७ गते इलाका प्रहरी कार्यालय काकडभिट्टा झापा र इलाका प्रहरी कार्यालय अनारमनी झापाको निरीक्षण गर्नुका साथै कार्यरत प्रहरी कर्मचारीहरुलाई आवश्यक निर्देशन दिनु भएको छ ।

निरीक्षणको क्रममा उहाँले कार्यालय तथा शाखाहरुको अभिलेख व्यवस्थापन तथा हिरासत कक्षको निरीक्षण गर्नुका साथै कार्यरत प्रहरी कर्मचारीहरुलाई सुशासनलाई संस्थागत गर्दै नागरिकमैत्री प्रहरी सेवा प्रवाह गर्न निर्देशन दिनुभएको छ । त्यसैगरी काँकडभिट्टा प्रमुख अन्तर्राष्ट्रिय नाका भएकाले सीमा क्षेत्रमा हुन सक्ने अवैध घुसपैठ, लागूऔषध ओसार पसार, भन्सारछली लगायत अन्य आपराधिक गतिविधि नियन्त्रणका लागि चेकजाँचकाई प्रभावकारी बनाउन, पुर्वी नकाबाट नेपाल भ्रमणको लागी आउनु हुने विदेशी नागरिकहरुसँग नम्र, शिष्ट र सभ्य व्यवहार गर्दै आगमनदेखि प्रस्थान बिन्दु सम्म सहजीकरण र आवश्यक सहयोग उपलव्ध गराउन निर्देशन दिनु भएको छ ।

यसै गरी निर्माणाधीन राजमार्गमा दुर्घटना न्यूनीकरणका लागि पर्याप्त रिफ्लेक्टर स्टिकर तथा सडक चिन्ह राख्ने व्यवस्था मिलाउन र साइबर अपराध, लागुऔषध दुर्व्यसन विरुद्ध समुदाय स्तरमा सचेतनामूलक कार्यक्रमहरूलाई प्रभावकारीरुपमा सञ्चालन गर्न जोड दिनु भएको छ ।

निरीक्षण भ्रमणको क्रममा जिल्ला प्रहरी कार्यालय झापाका प्रहरी उपरीक्षक बसुन्धरा खडका र कोशी प्रदेश प्रहरी कार्यालय विराटनगरका प्रहरी नायब उपरीक्षक राम प्रसाद तिमल्सिना समेतको उपस्थिति रहेको थियो ।