जिल्ला प्रहरी कार्यालय झापा र बिपद ब्यवस्थापन गुल्म चन्द्रगढीको निरीक्षण भ्रमण
२०८३-०४-२७
- A
- A-
- A+
कोशी प्रदेश प्रहरी प्रमुख प्रहरी नायव महानिरीक्षक शेखर खनालले जिल्ला प्रहरी कार्यालय झापा र बिपद ब्यवस्थापन गुल्म चन्द्रगढीको निरीक्षण भ्रमण गर्नु भएको छ । साउन २७ गते निरीक्षण भ्रमणको क्रममा उहाँले कार्यालय तथा सम्पुर्ण शाखाहरु तथा बिपद उद्धारमा प्रयोग हुने सामग्रीहरुको निरीक्षण अवलोकन गर्नुका साथै कार्यरत प्रहरी कर्मचारीहरु, मातहत इकाई प्रमुखहरु तथा सीमावर्ती इलाकामा खटिएका प्रहरी अधिकृतहरुलाई आवश्यक निर्देशन दिनुभएको छ ।
• निर्देशनको क्रममा उहाँले प्रहरी कर्मचारीको बोली, बचन र व्यवहारबाट नेपाल प्रहरी संगठनको छवि प्रतिविम्बित हुने भएकाले सम्पूर्ण प्रहरी कर्मचारीहरूले नम्र, शिष्ट, सभ्य बोलिवचनका साथ सदैव जनसेवामा आफूलाई समाहित गर्न,
• पेण्डिङ मुद्दा फर्छ्यौट, साइबर अपराध, अनलाइन ठगी, स्क्यामिङ, बेटिङ र हुण्डी लगायतका अपराध नियन्त्रण गर्न प्रभावकारी भुमिका निर्वाह गर्न,
• झापा जिल्लामा खुल्ला सीमानाको कारण हुनसक्ने अपराधिक गतिविधि, अवैध चोरी–निकासी, पैठारी र लागूऔषधको ओसारपसार नियन्त्रणका लागि कडाइका साथ चेकजाँच तथा विशेष अपरेसन सञ्चालन गर्न ।
• समुदायबीच वैमनस्य र द्वन्द्व निम्त्याउन खोज्ने व्यक्ति, सामाजिक सञ्जालमार्फत अफवाह फैलाउने व्यक्तिलाई कडा निगरानी राखी कानुनी कारबाही गर्न,
• सवारी दुर्घटना न्यूनीकरण गरी ट्राफिक व्यवस्थापन प्रभावकारी बनाउन, समुदाय-प्रहरी साझेदारी कार्यक्रमहरु मार्फत आम नागरीकहरुसंग सद्भाव र भाइचारा अभिवृद्धि हुने गरी सचेतनामुलक कार्यक्रमहरुलाई प्रभावकारीरुपमा निरन्तरता दिन,
• मनसुनजन्य विपद्का घटनाहरुको सम्भावना अझै रहन सक्ने भएकोले तत्काल उद्धार कार्यमा परिचालन हुन उद्धार सामाग्री सहित तयारी अवस्थामा रहन निर्देशन दिनुभयो ।
निरीक्षण भ्रमणको क्रममा जिल्ला प्रहरी कार्यालय झापाका प्रमुख प्रहरी उपरीक्षक बसुन्धरा खड्काले झापा जिल्लाको समग्र शान्ती सुरक्षाको अवस्था, जनशक्ति व्यवस्थापन, भावि कार्य योजना, सुरक्षा चुनौतीहरु, भारतीय काउन्टर पार्टस संगको समन्वय र सहकार्य लगायतका विषयहरुमा प्रदेश प्रहरी प्रमुख खनाललाई अवगत गराउनु भएको थियो ।