कोशी प्रदेश प्रहरी प्रमुख प्रहरी नायव महानिरीक्षक शेखर खनालले कोशी प्रदेश प्रहरी कार्यालय, विराटनगरमा कार्यरत सिनियर प्रहरी अधिकृतदेखि आधारभूत तहसम्मका प्रहरी कर्मचारीहरूसँग परिचयात्मक भेटघाट तथा अन्तरक्रिया गर्नुभएको छ । साउन २२ गते कोशी प्रदेश प्रहरी कार्यालयको सभाहलमा आयोजित कार्यक्रममा उहाँले अन्तरक्रियाका क्रममा प्रहरी कर्मचारीहरूले उठाएका समस्या, गुनासा, जिज्ञासा तथा सुझावहरूलाई गम्भीरतापूर्वक सुनुवाई गर्नुका साथै संगठनको नीति, कानुनी व्यवस्था र उपलब्ध स्रोत–साधनको आधारमा यथोचित सम्बोधन गर्ने प्रतिबद्धता व्यक्त गर्नुभयो । उहाँले संगठनभित्र अनुशासन, व्यावसायिकता, पारदर्शिता, जवाफदेहिता र सेवामुखी कार्यशैलीलाई थप सुदृढ बनाउन तथा आफ्नो व्यक्तिगत सुरक्षा, स्वास्थ्यमा सदैव ध्यान दिन  सम्पुर्ण प्रहरी कर्मचारीलाई निर्देशन दिनुभयो । प्रदेश प्रहरी प्रमुख खनालले नागरिकको विश्वास जित्ने आधार भनेकै इमानदार, निष्पक्ष र प्रभावकारी प्रहरी सेवा भएको उल्लेख गर्दै प्रत्येक प्रहरी कर्मचारीले उच्च मनोबल, नैतिक आचरण र जिम्मेवारीबोधका साथ आफ्नो कर्तव्य निर्वाह गर्नुपर्नेमा जोड दिनुभयो । उहाँले संगठनभित्र आपसी समन्वय, सहकार्य र सकारात्मक कार्यसंस्कृतिको विकासले प्रहरी संगठनलाई अझ सक्षम र जनउत्तरदायी बनाउने विश्वास व्यक्त गर्नुभयो ।

सोही अवसरमा उपस्थित महिला प्रहरी कर्मचारीहरूसँग पनि छुट्टै अन्तरक्रिया गर्नु भएको थियो । महिला प्रहरी कर्मचारीका अनुभव, समस्या, गुनासा तथा सुझावहरूलाई सम्वोधन गर्दै प्रदेश प्रहरी प्रमुख खनालले आधुनिक प्रहरी संगठनमा महिला प्रहरीको भूमिका अपरिहार्य, प्रभावकारी र सम्मानित रहेको बताउनुभयो । उहाँले महिला प्रहरी कर्मचारीलाई पेशागत क्षमता विकास, नेतृत्वदायी भूमिका र जिम्मेवारी निर्वाहमा आत्मविश्वासका साथ अघि बढ्न प्रेरित गर्दै कार्यसम्पादनका क्रममा देखिएका समस्या तथा गुनासाहरूलाई प्राथमिकताका साथ सम्बोधन गरिने विश्वास दिलाउनुभयो । यस्ता कार्यक्रमले प्रहरी प्रमुख र प्रहरी कर्मचारीहरु विच आत्मियता भाव बिकाश हुने, प्रहरी कर्मचारीहरुको पिरमार्का समस्या तत्कालै सम्वोधन गर्ने उदेश्यले कोशी प्रदेश प्रहरी कार्यालयले  यस्ता कार्यक्रमलाई निरन्तरता दिदै आईरहेको छ ।