कोशी प्रदेश प्रहरी प्रमुख प्रहरी नायव महानिरीक्षक शेखर खनालले नेपाल प्रहरी विशेष सुरक्षा गण दुहबी सुनसरीको निरीक्षण भ्रमण गर्नु भएको छ । भदौ ०२ गते निरीक्षण भ्रमणको क्रममा वहाँले कार्यालय भवन, सम्पूर्ण शाखाहरुको निरीक्षण गर्नुका साथै कार्यरत प्रहरी अधिकृत तथा प्रहरी कर्मचारीहरूलाई आवश्यक निर्देशन दिनु भएको छ । निर्देशनको क्रममा उहाँले प्रहरी कर्मचारीहरू शारीरिक तथा मानसिकरूपमा स्वास्थ्य र तन्दुरुस्त भए मात्र आम नागरिकलाई प्रभावकारी सुरक्षा प्रदान गर्न सकिने भएको हुँदा कार्यरत प्रहरी कर्मचारीहरूलाई दैनिकरूपमा व्यायाम र पोषणयुक्त खानाको प्रबन्ध मिलाउन निर्देशन दिनुभयो । विशेष सुरक्षा गणमा कार्यरत प्रहरी कर्मचारीहरू विशेष गरी विपद उद्धार, भिड, हुलदङ्गा नियन्त्रण र जस्तो सुकै विषम परिस्थितिमा तत्काल परिचालन भई स्थितिलाई नियन्त्रणमा लिई नागरिकको सुरक्षा गर्नु पर्ने भएको हुँदा प्रहरी परिचालन हुनु अगावै कमाण्डरहरूले आवश्यक ब्रिफिङ गर्न, स्थितिलाई नियन्त्रणमा लिँदा कमाण्डरको निर्देशन बमोजिम सिलसिलेबार बल प्रयोगका सिद्धान्त अवलम्बन गरी प्रहरी कारवाही गर्न निर्देशन दिनु भएको छ । साथै उहाँले आफू बस्ने कार्यालय लगायत विपद उद्धार तथा भिड नियन्त्रणमा प्रयोग हुने सामाग्रीहरूको नियमित सरसफाइमा विशेष ध्यान दिन र विपदका घटनाहरूमा उद्धारको निम्ति आवश्यक सामाग्रीहरू सहित तत्काल परिचालन हुन सक्ने गरी तयारी अवस्थामा रहन निर्देशन दिनु भएको छ । निरीक्षण भ्रमणको क्रममा प्रदेश प्रहरी प्रमुख खनाललाई नेपाल प्रहरी विशेष सुरक्षा गण दुहबीका प्रमुख प्रहरी उपरीक्षक केशव भट्टराईले प्रहरी जनशक्ति व्यवस्थापन, विपद् व्यवस्थापन लगायतका आकस्मिक तथा विशेष परिस्थितिमा प्रहरी परिचालनको अवस्था, कार्य योजनाको बारेमा अवगत गराउनु भएको थियो । निरीक्षण भ्रमणको क्रममा कोशी प्रदेश प्रहरी कार्यालय विराटनगरका प्रहरी उपरीक्षक नारायण प्रसाद चिमरीया सहित प्रहरी अधिकृतहरूको उपस्थिति रहेको थियो ।