कोशी प्रदेश प्रहरी कार्यालय विराटनगरको सभाहलमा संचालित ५ कार्य दिन आवधिको “मर्यादापालकको दक्षता अभिवृद्धि अनुशिक्षण” तालिम प्रथम समूहको कोशी प्रदेश प्रहरी प्रमुख प्रहरी नायव महानिरीक्षक शेखर खनालको प्रमुख आतिथ्यतामा साउन २९ गते समापन भएको छ । तालिम समापन कार्यक्रमलाई सम्बोधनको क्रममा प्रमुख आतिथि खनालले संसदीय बैठकलाई सुरक्षित, व्यवस्थित र मर्यादित रूपमा सम्पन्न गराउन मर्यादापालकको भूमिका महत्वपूर्ण हुने हुँदा बैठकमा सुरक्षा व्यवस्थापन, प्रवेश नियन्त्रण तथा आकस्मिक अवस्थामा प्रभावकारी रूपमा परिचालन भई परिस्थितिलाई नियन्त्रणमा लिन प्रहरी कर्मचारीहरूलाई निर्देशन दिनुभयो । उहाँले तालिमका क्रममा प्राप्त ज्ञान, सीप र अनुभवलाई कार्यक्षेत्रमा प्रभावकारी रूपमा कार्यान्वयन गर्न, आफ्नो जिम्मेवारी निर्वाह गर्दा अनुशासन, संयमता, व्यावसायिकता र समन्वयलाई विशेष प्राथमिकता दिन जोड दिनुभयो । उहाँले तालिमरत प्रशिक्षार्थीहरूबाट उठेका जिज्ञासाहरूको समेत सम्बोधन गर्नुका साथै आवश्यक स्पष्टता समेत प्रदान गर्नु भएको थियो ।

तालिम समापन कार्यक्रममा तालिम संयोजक प्रहरी निरीक्षक गजेन्द्र रायाले तालिम सम्बन्धी प्रतिवेदन पेश गर्नु भएको थियो । कार्यक्रममा प्रहरी वरिष्ठ उपरीक्षक योगेन्द्र सिंह थापा, कोशी प्रदेश सभा सचिवालयका उप-सचिव अर्जुन घिमिरे, प्रहरी उपरीक्षक सुमन कुमार तिम्सिना, प्रहरी उपरीक्षक नारायण प्रसाद चिमरीया सहित प्रहरी अधिकृतहरुको उपस्थिति रहेको थियो । कोशी प्रदेश सरकार मुख्य मन्त्री तथा मन्त्री परिषदको कार्यालय प्रदेश सहयोग कार्यक्रम अन्तरगत साउन २५ गतेबाट संचालन भएको ५ कार्य दिनको उक्त तालिममा २५ जना प्रहरी कर्मचारीहरुको सहभागिता रहेको थियो ।