प्रहरी संगठन प्रमुख प्रहरी महानिरीक्षक दान बहादुर कार्कीले प्रदेश प्रहरी प्रमुख सहित कोशी प्रदेश अन्तर्गत रहेका मातहत प्रहरी प्रमुखहरु लगायत प्रहरी अधिकृत तथा प्रहरी जवानहरुलाई अपराध नियन्त्रण गरी समाजमा शान्ति सुरक्षा कायम राख्न बदलिदो समय र परिस्थिति अनुसार आफुलाई समयानुकुल बनाई नागरिक मैत्री प्रहरी सेवा प्रदान गर्न निर्देशन दिनु भएको छ । पुस १५ गते कोशी प्रदेश प्रहरी तालिम केन्द्र विराटनगरको परिसरमा भएको निर्देशन सम्बोधन कार्यक्रममा वहाँले नेपाल प्रहरी एउटा अनुशासित संगठन भएकोले संगठनमा कार्यरत सम्पूर्ण प्रहरी कर्मचारीहरुले प्रहरी आचरण र अनुशासनलाई पालना गरी लगनशिल, कर्तव्य निष्ठ र इमान्दारिताका साथ आफ्नो पदिय दायित्व निर्वाह गर्न निर्देशन दिनु भयो । वहाँले लागूऔषधको प्रयोग तथा ओसार पसार, चोरी तस्करी, राजस्व छली लगायतका अपराधिक गतिविधि नियन्त्रण गर्न योजना अनुसार कडाईका साथ चेकजाँचको व्यवस्था मिलाउन तथा निकट भविश्यमा हुने निर्वाचन सुरक्षाको पूर्व तयारीका साथ आचार संहिताको पुर्णरुपले पालना गरी भयरहित वातावरणमा निर्वाचन सम्पन्न गराउन निर्देशन दिनु भयो । मातहत प्रहरी प्रमुखहरुले आ-आफ्नो मातहतमा रहेका ईकाइहरुको नियमितरुमा अनुगमन तथा निरीक्षण गरी भएका कमि कमजोरीहरुलाई सुधार गर्न लगाउनका साथै उत्कृष्ट कार्यको मुल्याङ्कन गरी तत्काल पुरस्कृत गर्न निर्देशन दिनु भयो । यसै गरी वहाँले सवारी दुर्घटनाको कारणबाट हुने जनधनको क्षेती न्यूनीकरण गर्न प्रविधिको उच्चतम प्रयोग गरी ट्राफिक व्यवस्थापन मिलाएमा ट्राफिक प्रहरीको उत्कृष्टता झल्कने बताउनु भयो । 

निर्देशन सम्वोधनको क्रममा प्रदेश प्रहरी प्रमुख प्रहरी नायव महानिरीक्षक विनोद घिमिरेले संगठन प्रमुखबाट भएको अमुल्य निर्देशनको आफु लगायत मातहत सम्पूर्ण प्रहरी कर्मचारीहरुले अक्षरस पालना गर्ने बताउदै संगठन प्रमुख प्रहरी महानिरीक्षक दान बहादुर कार्की प्रति हार्दिक आभार सहित धन्यवाद व्यक्त गर्नु भएको थियो ।