कोशी प्रदेशस्तरीय सुरक्षा गोष्ठी २०८२ सम्पन्न
२०८२-०९-१६
- A
- A-
- A+
नेपाल सरकार गृह मन्त्रालय र कोशी प्रदेश सरकार, आन्तरिक मामिला तथा कानून मन्त्रालयद्वारा संयुक्तरुपमा आयोजित कोशी प्रदेशस्तरीय सुरक्षा गोष्ठी सम्पन्न भएको छ । पुस १६ गते विराटनगर स्थित एसियाटिक होटलमा माननीय गृहमन्त्री ओमप्रकाश अर्यालको प्रमुख आतिथ्यता, कोशी प्रदेशका माननीय मुख्यमन्त्री हिक्मत कुमार कार्कीको विशेष आतिथ्यता तथा गृह सचिव राजकुमार श्रेष्ठको अध्यक्षतामा शुभारम्भ भएको प्रदेश स्तरीय सुरक्षा गोष्ठी कोशी प्रदेशमा शान्ति सुरक्षा प्रभावकारी बनाउने उद्धेश्यका साथ सम्पन भएको हो । उक्त गोष्ठीको माननीय गृहमन्त्री ओम प्रकाश अर्याल तथा कोशी प्रदेशका माननीय आन्तरीक मामिला तथा कानून मन्त्री रेवती रमण भण्डारीले संयुक्तरुपमा पानसमा दिप प्रज्वलन गर्नु भई कार्यक्रमको शुभारम्भ गर्नु भएको थियो । उक्त कार्यक्रमलाई सम्वोधनको क्रममा प्रमुख अतिथि माननीय गृहमन्त्री ओमप्रकाश अर्यालले जिल्लाहरुको शान्ति सुरक्षा प्रभावकारी बनाउन र भएका समस्या र चुनौतीलाई समाधान गर्न प्रदेशस्तरीय गोष्ठीले महत्वपूर्ण भुमिका निर्वाह गर्ने वताउनु भयो । वहाँले सुरक्षा निकायको मनोवल बढाउदा नै देशको मनोवल उच्च हुने हुँदा सुरक्षा निकायको मनोवल बढाउने कार्यमा नेपाल सरकार सदैव क्रियासिल रहेको बताउनु भयो । यसै गरी वहाँले निर्धारित समयमै निर्वाचन सम्पन्न गराउन नेपाल सरकार प्रतिवद्ध रहेको सवैमा अवगत गराउदै सहजताको वातावरण सृजना गरी देशमा सुशासन कायम राख्न सवैमा अनुरोध गर्नु भयो ।
कार्यक्रममा कार्यक्रमका विशिष्ठ अतिथि कोशी प्रदेशका माननीय मुख्यमन्त्री हिक्मत कुमार कार्कीले समाजमा सुशासन, समृद्धि र अमन चयन कायम राख्न सुरक्षा केन्द्रित गोष्ठीले उल्लेखनिय भूमिका निर्वाह गर्ने उल्लेख गर्दै जिम्मेवार निकायहरूले आ-आफ्नो क्षेत्रमा सक्रिय भई जिम्वेवारी अनुसारको दायित्व निर्वाह गर्नु पर्नेमा जोड दिनुभयो । वहाँले समाजमा शान्ति सुरक्षा प्रभावकारी बनाउन सुरक्षा निकायलाई आवश्यक श्रोत साधन उपलव्ध गराउन प्रदेश सरकार तत्पर रहेको वताउदै कोशी प्रदेशमा लागू पदार्थ दुर्व्यसन ठूलो समस्याकोरुपमा रहेकोले यसलाई नियन्त्रण गर्न विशेष अभियानका साथ अगाडि बढ्नु पर्ने बताउनु भयो ।
गोष्ठीमा प्रहरी महानिरीक्षक दान बहादुर कार्कीले कोशी प्रदेशको शान्ति सुरक्षा प्रभावकारी बनाउन तथा आसन्न निर्वाचनलाई सम्पन्न गराउन योजनाबद्धरुपमा थप सक्रियता एवम् रचनात्मक ढंगले आ-आफ्नो कार्यक्षेत्रमा अग्रसर रहि कार्य गर्न प्रदेश तथा जिल्ला प्रहरी प्रमुखहरूलाई निर्देशन दिनुभयो । प्रदेशमा शान्ति सुरक्षा कायम राख्न आ-आफ्नो दायित्व बोधबाट मात्र सम्भव हुने हुँदा भुगोललाई बुझेर काम गर्न, जेन्जी आन्दोलनमा प्रहरीका लुटिएका हातहतियार, कारागारबाट फरार कैदी र प्रहरी हिरासतबाट भागेका व्यक्तिहरुलाई नियन्त्रणमा लिन योजना बनाई सक्रियरुपमा प्रहरी परिचालन गर्न निर्देशन दिनु भयो । ट्राफिक प्रहरीले सवारी दुर्घटना न्यूनीकरण गर्न बसपार्क, जीप पार्कमै आवश्यक चेकजाँचको व्यवस्था मिलाई आवश्यकता अनुसार मात्र चेकजाँच गरी सवारी नियम उलंघन गर्नेलाई कारवाही गर्न तथा खुल्ला सिमानाको कारण हुने चोरी तस्करी, राजस्व चुहावट, अखाद्य बस्तु विक्री बितरण, कलोबजारी, गुण्डा गर्दी नियन्त्रण गर्न योजना अनुरुप प्रहरी परिचालन गर्न निर्देशन दिनु भएको छ । यसै गरी प्रहरीको मनोवल उच्च बनाउने कार्यमा लागि पर्न समेत गोष्ठीमा उपस्थित प्रहरी प्रमुखहरुलाई निर्देशन दिनु भयो ।
गोष्ठीमा कोशी प्रदेशका आन्तरिक मामिला तथा कानुन मन्त्री रेवती रमण भण्डारी, गृह सचिव राजकुमार श्रेष्ठ, कोशी प्रदेश सरकारका प्रमुख सचिव राजेन्द्र कुमार पौडेल, नेपाली सेनाका बलाधिकृत रथी प्रदिपजंग के.सी, सशस्र प्रहरी महानिरीक्षक राजु अर्याल, राष्ट्रिय अनुसन्धान विभागका मुख्य अनुसन्धान निर्देशक टेकेन्द्र कार्कीले प्रदेश स्तरिय सुरक्षा गोष्ठीको बारेमा आ-आफ्नो मन्तव्य व्यक्त गर्नु भएको थियो । यसै गरी आन्तरिक मामिला तथा कानून मन्त्रालय कोशी प्रदेशका प्रदेश सचिव नारायण प्रसाद रिसालले कोशी प्रदेशको सुरक्षा अवस्था र सुरक्षा चुनौती सम्वन्धि प्रस्तुति र गृह मन्त्रालयका सह सचिव आनन्द काफ्लेले स्वागत मन्तव्य सहित सुरक्षा गोष्ठीको उद्देश्यका बारेमा प्रस्तुतिकरण गर्नु भएको थियो भने १४ वटै जिल्लाका प्रमुख जिल्ला अधिकारीहरूले आ-आफ्नो जिल्लाको विद्यमान शान्ति सुरक्षाको अवस्था, समस्या, चुनौती, समाधानका उपाय लगायत विविध विषयमा प्रस्तुतिकरण गर्नुभएको थियो । उक्त गोष्ठीमा गृह मन्त्रालयका पदाधिकारीहरू, कोशी प्रदेशका प्रदेश स्तरीय सुरक्षा निकायका प्रमुखहरू, जिल्ला स्थित सुरक्षा निकायका प्रमुखहरूको सहभागिता रहेको थियो ।