संखुवासभा र उदयपुरको दुई छुट्टा छुट्टै स्थानमा सवारी दुर्घटना हुँदा २ जनाको मृत्यु भएको छ भने २६ जना घाईते भएका छन् । फागुन ८ गते साँझ संखुवासभाको सभापोखरी गाँउपालिका-६ स्थित भित्री सडक खण्डमा भे २ त १९२९ नम्बरको वालुवा लोड गरेको ट्याक्टर आफै अनियन्त्रित भई बाटो देखि ६० मिटर तल खोल्सिमा झरेर दुर्घटना हुँदा ट्याक्टर चालक संखुवासभा चैनपुर नगरपालिका-६ का १९ बर्षीय रबि बराईली गम्भिर घाईते भएका थिए । घटना बारेमा जानकारी पाउनासाथ तत्काल घटनास्थल तर्फ खटिएको प्रहरी चौकी बाह्रबिसे संखुवासभाको प्रहरी टोलीले घाईतेलाई उद्दार गरी उपचारको लागी जिल्ला अस्पताल खादबारी लगिएकोमा उपचारको क्रममा उनको मृत्यु भएको थियो । यसैगरी उदयपुरको त्रियुगा नगरपालिका-७ स्थित मदन भण्डारी राजमार्गमा जन्ती बोकेर गाइघाट तर्फ आउँदै गरेको बाग्मती प्रदेश ०६-००१ ख ०१९५ नम्बरको बस र विपरीत दिशाबाट जाँदै गरेको ना ८ ख २४०४ नम्बरको मिनी ट्रक एक आपसमा ठक्कर खाई दुर्घटना हुँदा घाईते भएका २६ जना मध्ये २१ जना जिल्ला अस्पताल उदयपुरमा उपचार पश्चात डिस्चार्ज भएका छन भने गम्भिर घाईते भएका वारा जिल्ला गढी गाउँपालिका-४ का ७० बर्षीय सिताराम धामीको बिराटनगर न्युरो अस्पतालमा उपचारको क्रममा मृत्यु भएको छ । ट्रक चालक वारा जितपुर नगरपालिका-२४ का २५ बर्षीय सजाद आलाम धोवी र बस चालक रौतहट जिल्ला खतुवा बिजयपुर नगरपालिका-११ का ४५ बर्षिय कपिलदेव राय लाई जिल्ला प्रहरी कार्यालय उदयपुरले नियन्त्रणमा लिएको छ भने घटना सम्बन्धमा थप अनुसन्धान भईरहेको छ ।