प्रदेश प्रहरी प्रमुखबाट कोशी प्रदेश प्रहरी तालिम केन्द्रको निरीक्षण “समाजको मुटुरुपी प्रहरीलाई समाजलाई जीवन्त, गतिशील र सुरक्षित राख्न प्रशिक्षण केन्द्रले नै सिकाउनु पर्ने”
२०८१-०९-२१
- A
- A-
- A+
कोशी प्रदेश प्रहरी प्रमुख प्रहरी नायव महानिरीक्षक राजन अधिकारीले पुस २१ गते कोशी प्रदेश प्रहरी तालिम केन्द्र रानी विराटनगरको स्थलगत निरीक्षण भ्रमण गर्नु भएको छ । निरीक्षण भ्रमणको क्रममा वहाँले प्रहरी तालिम केन्द्रको प्रहरी व्यारेक, मेष, चमेना, क्यान्टिन, पुस्ताकलय, आन्तरिक एवं बाह्य प्रशिक्षण कक्ष साथै प्रशिक्षार्थीहरुको व्यक्तिगत टर्न आउट समेतको निरीक्षण गर्नु भएको छ । निरीक्षण कार्यक्रम पश्चात प्रदेश प्रहरी प्रमुख अधिकारीले कार्यरत प्रहरी अधिकृत तथा प्रहरी कर्मचारीहरुका साथै तालिमरत सम्पूर्ण प्रशिक्षार्थीहरुलाई आवश्यक निर्देशनको क्रममा तालिम केन्द्र व्यवसायिक प्रहरी जनशक्ति उत्पादन गर्ने उद्गम स्थल भएकोले प्रशिक्षार्थीहरुको कार्यक्षमता अभिवृद्धि गर्न तथा ज्ञान, सिपको विकाश गरी जनअपेक्षा अनुसार प्रहरी सेवा प्रवाह गर्न अनुशासित, कर्तव्यपरायण र जिम्मेवारीवोध सहितको सक्षम, कुशल प्रहरी जनशक्ति उत्पादन गर्न प्रशिक्षकहरुले उच्च मनोवलका साथ समयानुकुल असल अभ्यास सहित बैज्ञानिक पद्दति अनुसार प्रशिक्षण प्रदान गर्न तथा प्रशिक्षार्थीहरुले आफुले प्राप्त गरेको ज्ञान र शिपलाई इमान्दारिताका साथ सेवा प्रवाह गर्न निर्देशन दिनु भएको छ ।
वहाँले समाजको मुटुरुपी प्रहरीलाई समाजलाई जीवन्त, गतिशील र सुरक्षित राख्न कसरी प्रस्तुत हुने भन्ने विषयमा प्रशिक्षण केन्द्रले नै तालिमरत प्रहरी कर्मचारीहरुलाई सिकाउनु पर्ने र प्रशिक्षण प्रदान गर्ने गुरु हरेक विषयमा नमुना हुन जरुरी रहेको बताउदै तालिम केन्द्र प्रत्यक्षरुपमा समाजमा शान्ति सुरक्षाको लागि परिचालन नभएता पनि समाज र बर्तमान सुरक्षाको अवस्थाको वारेमा जानकार हुन आवश्यक रहेको वताउनु भयो ।
निरीक्षण भ्रमणको क्रममा तालिम केन्द्रका समादेशक प्रहरी वरिष्ठ उपरीक्षक अबि नारायण काफ्लेले तालिम केन्द्रको समग्र बस्तुस्थिति सहितको प्रस्तुतिकरण गर्नु भएको थियो भने प्रदेश प्रहरी प्रमुख अधिकारीले कार्यालयको परिसर भित्र बृक्षारोपण समेत गर्नु भएको थियो ।