नेपाल सरकार गृह मन्त्रालय र प्रहरी प्रधान कार्यालय मानवश्रोत एंवम प्रशासन विभाग कर्मचारी प्रशासन शाखा नक्साल, काठमाण्डौंको पत्रादेशानुसार प्रहरी निरीक्षक पदबाट प्रहरी नायव उपरीक्षक पदमा बढुवा हुनु भएका प्रहरी नायव उपरीक्षक कासीनाथ रेग्मी दर्ज्यानी चिन्हद्वारा सुशोभित भएका छन् । कोशी प्रदेश प्रहरी कार्यालयमा बुधबार आयोजित एक समारोह बीच प्रहरी नायव महानिरीक्षक राजेशनाथ बास्तोलाले प्रहरी नायव उपरीक्षक कासीनाथ रेग्मीलाई दर्ज्यानी चिन्हद्वारा सुशोभन गर्नुभएको हो । सु-शोभन समारोहलाई सम्बोधन गर्दै प्रहरी नायव महानिरीक्षक बास्तोलाले संगठनको गहन एवम् महत्त्वपूर्ण जिम्मेवारी सम्हाल्ने पदमा पदोन्नति भएकोमा बधाई दिँदै सफल कार्यकालको शुभकामना दिनु भएको छ। उक्त अवसरमा पदोन्नति हुनुभएका प्रहरी नायव उपरीक्षक कासीनाथ रेग्मीले मन्तव्य व्यक्त गर्दै प्रहरी संगठनले दिएको जिम्मेवारीलाई व्यावसायिक निष्ठा र इमानदारिताका साथ उत्कृष्ट ढंगले कार्यसम्पादन गर्ने प्रतिबद्धता व्यक्त गर्नुभयो । समारोह  कार्यक्रममा प्रहरी उपरीक्षक, प्रहरी अधिकृतहरु एवंम प्रहरी कर्मचारीहरूको समेत उपस्थिति रहेको थियो ।